Salamah bin Qays Al-Ashjaiy - Alieifungua Kurdistan
Alipitisha
Al-farouq usiku wake akiwa macho akikagua vichochoro vya Madina ili watu walale
wakiwa katika hali ya amani na salama. Ilikuwa wakati wa doria yake baina ya
majumba na masoko akihesabu akilini mwake watu wa kheri na muruwa na mashujaa
miongoni mwa masahaba wa Mtume (Sallallahu ‘Alayhi Wasallam); ili mmoja wao
ampe bendera kuongoza kikosi cha kwenda kufungua mji wa Al-Ahwazi.
Haukupita muda na akasema:
“Nimempata naam. Nimempata Inshaallah”. Asubuhi ilipochomoza akamwita
Salamah bin Qays Al-Ashaja’iy akamwambia; “Mimi ninakukabidhi uongozi wa kikosi
kinachoelekea Al-Ahwazi. Nenda kwa jina la Allah na pigana kwenye njia ya Allah
kwa kila aliemkufuru Allah. Na mkikutana na adui wenu katika washirikina, basi
walinganieni Uislamu. Wakisilimu na kuamua kubakia katika miji yao na wala
wasishiriki nanyi kumpiga vita yeyote yule, na hawana jukumu ila kutoa zake, na
wala wasipewe chochote katika ngawira. Ama wakiamua kushiriki nanyi watashiriki
mfano wenu. Ama wakipinga kuingia katika Uislamu basi walinganieni kutoa jizya
na waacheni na mambo yao na muwalinde dhidi ya maadui wao na wala
usiwakalifishe juu ya nguvu zao. Ama wakipinga hapo wapigeni vita na hakika
Allah ni mwenye kukunusuruni. Ama wakijiimarisha kwenye ngome halafu wakataka
kwenu mufuate hukumu ya Allah na Mtume wake basi hilo msilikubali kwani hamjui
ni ipi hukumu ya Allah na Mtume wake. Ama wakitaka wateremshwe kwenye dhima ya
Allah na Mtume wake, basi wapeni dhima yenu nyinyi. Mkienda kupigana
msifanye israfu (msichupe mipaka) wala msifanye khiyana, wala msichinjechinje
kwa kukata viungo na wala msiuwe watoto".
Akasema Salamah; “Tunasikia na kutii
ewe Amiirul Muuminina"
Amiirul Muuminina akamuaga kwa
hamasa na kuushika kwa nguvu mkono wake na kumuaga kwa du’aa. Alikuwa
anatambua Khalifa uzito wa jukumu alilojibebesha na kubebesha jeshi lake kwani
mji wa Al-Ahwazi ulikuwa ni mji wa milima, wenye njia ngumu na una ngome imara
uliopo baina ya Basra na milima ya Fursi (Persia)
Wakaazi wake walikuwa ni wakurdi,
watu wa vita na ilikuwa hakuna budi kwa Waislamu ila kuukomboa ili wajizuilie
na mashambulizi ya wafursi dhidi ya mji wa Basra na kuwazuilia kuufanya kambi
ya askari wao, na ikawa Iraq katika hatari daima.
Alitoka Salamah bin Qays akiongoza
jeshi la ufunguzi katika Al-Ahwazi lakini muda mfupi tu baadae walianza
kupambana na maumbile magumu ya ardhi hiyo. Kikosi kikaanza kupata shida ya
kupanda na kushuka majabali marefu na kupita kwenye mwitu wake mnene na
kupambana na nyoka wake na nge wenye sumu, katika hali ya kulala au kuwa macho.
Lakini roho ya Salamah iliyojawa imani na mapenzi ilikuwa ni yenye kupepea kwa
mbawa zake askari wake. Hakika shida ni laini na huzuni ni nyepesi.
Alikuwa mara kwa mara akiwaliwaza
kwa mawaidha yaliyozitikisa nyoyo zao, na akawachombeza usiku wao kwa raha na
ladha ya Qur’aan. Wakawa wamegubikwa kwa nuru yake wakimsabihi Allah na kuanza
kusahau shida zilizowafika. Salamah alitekeleza wasia wa Amiirul Muuminina.
Na alipokutana tu na watu wa
Al-Ahwazi alianza kuwalingania kuingia katika Uislamu lakini walipinga na
kukataa. Akawalingania kutoa jizya pia walipinga na kufanya kiburi na hapakuwa
na chaguo ila panga kugongana.
Wakapigana mujahidina katika njia ya
Allah wakitamani kwake malipo yaliyo mazuri vita vikapamba moto, na makundi
mawili yakakutana kila mmoja kwa ushujaa na nguvu zake hali ambayo haikupata
kuonekana ila katika vita vichache tu.
Vita vikaendelea vikiashiria ushindi
mkubwa wa jeshi la mujahidina waumini wenye kunyanyua neno la Allah, na
kushindwa kubaya kwa washirikina maadui wa Allah. Vita vilipomalizika Salamah
bin Qays alianza kugawa ngawira baina ya askari wake. Akakutia miongoni mwa
ngawira hizo mapambo mazuri sana akawaambia Mujahidina: “Je zitaridhika nafsi
zenu kama tutampelekea haya Amiirul Muuminina?” Wakasema; “Ndio.” Akayatia
mapambo hayo ndani ya kisanduku na akamtuma mtu katika watu wake wa Bani al
ashja’iy na kumwambia; “Nendeni wewe na kijana wako Madina na mumbashirie
Amiirul Muuminina ushindi na umkabidhi mzigo (mapambo haya)”.
Ilikuwa baina ya mtu huyu na Amiirul
Muuminina habari yenye mazingatio na mawaidha. Hebu na tumwambie
huyu mtu atusimulie habari hiyo yeye mwenyewe. Anasema kijana huyu wa
kiashja’iy:
“Nilitoka mimi na kijana wangu mpaka
Basra na kununua farasi wawili kwa gharama alizotupa Salamah bin Qays na
tukawabebeshea mizigo yetu ya safari. Tukatoka baada ya hapo kuelekea Madina,
tulipofika na kuanza kumtafuta Amiirul Muuminina tulimkuta amesimama akiwagaia
chakula Waislamu na huku ameegemea bakora yake mfano wa mchungaji,
alikuwa akizungukia sinia akisema; “Ewe Yarfaa waongeze hawa nyama. Ewe Yarfaa
waongeze hawa mkate. Ewe Yarfaa waongeze hawa mchuzi” Nilipokaribiana nae
akasema; "Kaa kitako" Nikakaa mwisho walipo watu, akanisogezea
chakula nikala.
Baada ya watu kumaliza kula alisema;
“Ewe Yarfaa ondosha sinia". Kisha akaondoka nami nikamfuata alipoingia
nyumbani kwake niliomba ruhusa kuingia. Alikuwa amekaa kwenye busati ameegemea
mito miwili ya ngozi iliyojazwa majani ya mtende (makuti), akanisogezea mmoja
nikakalia, nyuma yake palikuwa na paziya, na aliita kupitia kwenye pazia; “Ewe
Ummu kulthum tuletee chakula chetu” Nikasema ndani ya nafsi yangu; “Pengine ni
chakula cha Amiirul Muuminina alichowekewa maalum kwa ajili yake. Pakaletwa
mkate na mafuta na vidonge vya chumvi bado havijasagwa. Akanielekea akasema;
"Kula". Nikala kidogo nae pia akala.
Sijapata kumuona mtu bora katika
kula kama yeye. Baadae akasema; "lete kinywaji". Kikaletwa kinywaji
kilichotengenezwa kwa ngano (sha’iyr) Akasema; "mpe huyu mtu mgeni
kwanza" Nikachukua bilauli nikanywa kidogo na kilikuwa ni kinywaji kizuri
kitamu. Akachukuwa yeye na kunywa mpaka akatosheka na halafu akasema;
"Ninamshukuru Allah alietulisha tukashiba na kutunywesha na kukata kiu
zetu"
Tukazungumza baada ya hapo na
kumuambia kuhusu ujumbe wake “Ewe Amiirul Muuminina nina ujumbe wako”
Akasema; “kutoka wapi?”
Nikasema; “Kutoka kwa Salamah bin
Qays”
Akasema; “Karibu Salamah bin Qays
karibu mjumbe wa Salamah bin Qays”
“Hebu nisimulie habari za jeshi la
Waislamu”
Nikamwambia; “Kama unavyopenda
ewe Amiirul Muuminina kheri na ushindi dhidi ya adui wako na maadui wa Allah”
Nikampa habari njema ya ushindi kwa
ukamilifu akasema “Alhamdulillah aliyetoa na kufadhilisha na akaneemesha na
kuzidisha.”
Akasema; "Ulipita Basra?"
Nikasema; "Ndiyo ewe Amiirul
Muuminina"
Akasema; “Vipi hali ya Waislamu
huko?”
Nikamwambia; “nzuri"
Akasema “Vipi bei za bidhaa?”
Nikamwambia; “Bei zao ni rahisi
sana”
Akasema; “Vipi nyama? Kwani
nyama ni chakula cha msingi kwa waarabu na bila hicho maisha hayawi”
Nikasema; “Imejaa tele”.
Mara akakitazama kile kisanduku
nilichokuja nacho akasema; “Ni kitu gani hicho mkononi mwako?”
Nikamwambia; “Allah alipotupa
ushindi dhidi ya adui yetu tulikusanya ngawira nyingi, Salamah bin Qays
akakutia mapambo mazuri akawaambia askari wake hakika mapambo haya yakigaiwa
kwenu hayatatosheleza jee itawafurahisha ikiwa nitampelekea Amiirul Muuminina?
Nao wakasema “Ndio"
Hapo nikamkabidhi kisanduku
alipokifungua na kuona vilivyomo. Yalikuwa mapambo rangi mbali mbali
nyekundu, kijani, manjano. Alisimama ghafla pale alipokaa na kukirembea
kisanduku na kutawanyika vilivyomo ardhini kuliani na kushotoni mwake. Wanawake
waliopo walichungulia mapaziani wakidhani labda anataka kumdhuru na akaniambia;
“Viokote! Vikusanye!”
Akamwambia kijana wake Yarfaa;
‘”Mtie adabu kali huyo” Huku nikiwa nakusanya mabaki ya mapambo na
huku ananipiga akaniambia; "Wewe na rafiki yako nyote sio watu wema"
Nikamuomba aniruhusu niondoke mimi
na kijana wangu na tuelekee Al Ahwazi kwani farasi wangu amechukuliwa na Yarfaa
akasema; “Yarfaa wape farasi katika farasi wa sadaka yeye na kijana wake” Kisha
akamwambia; “Mkimaliza shughuli zenu juu ya wanyama hao basi wapeni wale ambao
mtaona ni wahitaji zaidi” Nikasema; “Nitafanya hivyo ewe Amiirul Muuminina”
Akanielekea na kusema; “Wallahi ikiwa askari wataondoka na kutawanyika na
hamjawagawia mapambo haya basi wewe na mwenzio nyote mtapata adhabu kali”
Nikaondoka hapo haraka haraka mpaka
kwa Salamah bin Qays. Nikamwambia; “Haikuwa njema kazi uliyonituma hivyo haraka
haraka yagawe mapambo haya kabla msiba haujatufika mimi na wewe".
Nikamueleza habari yote, na hakuondoka Salamah
kwenye majlis yake ila baada ya kuyagawa yale mapambo yote.